Røde Kors på plass etter orkanen Dagmar

- Når nauda er størst er vi der, sa lokalforeiningsleiar i Ørsta Røde Kors, Ingeborg Hovden Standal, i samband med at Røde Kors lånte ut satelittelefon til ei isolert bygd i kommuna.

Ansvar for aggregat til omsorgsbustad

I Volda hadde Røde Kors Hjelpekorps ansvar for drift og bensinpåfylling av aggregat for å få lys og varme til Folkestadtun, ein omsorgsbustad i kommunen som var utan straum i 3 døgn. Dette fortel Tormod Eldholm, operativ leiar i Volda Røde Kors Hjelpekorps.

Røde Kors på besøk med kaffi på termos

I Eidsdal i indre del av Sunnmøre, stilte Røde Kors opp med kaffi på termos og gjekk på besøk til dei som var heime åleine, for å sjekke at alt stod bra til. Huset til Eidsdal/Norddal Røde Kors har gassovn, og der fekk dei kokt kaffe. - Vi tilbydde vår hjelp til kommuna, og vi føler at vi fekk gjort ein innsats ved å bry oss, seier Heidi Melchior, leiar i Eidsdal/Norddal Røde Kors.

Kriseleiinga i Ørsta kommune nytta Røde Kors huset

I Ørsta måtte kriseleiinga i kommuna låne Røde Kors sine lokale kvelden 1. juledag, då det var problem med aggregata på rådhuset. Røde Kors sendte også ut patruljer i sentrum, for det var ekstra bekymring knytt til den store aktiviteten i småbåthavna, der mange jobba på spreng for å redde båtar og kaianlegg. Heldigvis gjekk dette bra utan noko personskader.

Satelittelefon til isolert grendalag

Etter kvart som ein fekk oversikt over situasjonen, viste det seg at fleire grendalag var utan kommunikasjon med omverda. Norangsdalen i Ørsta var ein av desse stadane, og 4. juledag reiste Røde Kors inn til bygda og dei fekk låne ein satelittelefon. Dette sette bygda veldig stor pris på, og Bernt Arve Hustad frå Ørsta Røde Kors vart godt motteken av grendalagsleiaren.

Ros frå politiet

Politiet har rosa Røde Kors for å sjølve ta initiativ til samarbeid med kommune og politi i ein kaotisk situasjon. Både Ørsta og Volda kommune var hardt ramma av orkanen, og stengde vegar kombinert med straumbrot, ikkje mobil, fasttelefon eller internett, skaper utfordringar. - Når nauda er størst er vi der, sa lokalforeiningsleiar i Ørsta Røde Kors, Ingeborg Hovden Standal, i samband med at Røde Kors lånte ut satelittelefon til ei isolert bygd i kommuna.